زندگی نامه عاشیق آزافلی میكائیل به زبان ترکی
او همان كند ده بویا-یاشا دولدوقدان سونرا یاواش-یاواش هنره مایل اولوب ساز چالماغا، شعر قوشماغا هوس گوستریب، نهایت ائل ایچینده ((عاشیق)) اولور. ائل عاشیقی چوخ تئز عدالت وورغونو اولور و اونون دالینجا یئری-گویو گزیر:
خوشدور جانی حق یولوندا اوزدویوم
شرفینه سؤزدن اینجی دوزدویوم
آزافلی یام دونیا اوچون گزدیییم
عدالت دیر، عدالت دیر، عدالت
آمما استالینین میلیون لار انسانی گولله له دیگینی گؤردوكده او دیكتاتورا قارشی چیخیب، پرستش اولونان شكیلین اوزونه مركب سپیب، دیكتاتورون ((اوزونو قارا)) ائدیر.بونا گؤره ده امنیت مامور لارینین طرفیندن یاخالانیب زیندانا آتیلیر. مودتلر زینداندا قالاندان سونرا نهایت بیر گون حبسی قورتولوب ائل ایچینه قاییدیر.
بو زامان بویوك وطن محاربه سی باشلاییر و عاشیق سربازچیلیغین، كشفیات اداره سینده كئچیرماغا قرار وئریر.
آمما اوردا روس لارین آذربایجان لیلارا ائتدیگی ظلم لری گؤردوكده قانی جوشوب یئنه عدالت سیزلیگه قارشی چیخیر.
قضا دان بیر گون نئچه آذربایجانلی سربازین بیر روس كاماندری طرفیندن نارفیق لیق( غیر كمونیست لیق) اتهامی ایله عدالت سیزلیك له گوللله نمه سینی گؤردوكده بیر آذربایجانلی افسرله بیر لیكده(( روس كاماندرین)) اؤلدوروب قاچاق دوشور.
محاربه بیتدیكدن و عمومی عفو اعلان اولدوقدان سونرا، باشی قالماقاللی انقلابچی عاشیق اؤز صنعتینه قایدیب شعرلری ایله ائل-اوبانی روس لارین علیهینه جوشدورور.
اشغالچی روس اَل آلتی لاری اوچونجو دفعه اولاراق اونو یئنه ده توتوب حبسه آتیرلار.
بیر مودت سونرا آذربایجانین غیرتلی ائولادینین آغیر چالیشدیقلاری كولگه سینده عاشیق حبسدن قورتولوب یئنه اؤز صنعتینه قاییدیر.
میلادی 1987-نجی ایلده عاشیقین((قوجا قارتال)) كتابی نشر اولور و استادین شعرلری گون اوزو گؤرور.
استاد آزافلی میكائیل نهایت روس و اونلارین اَل آلتی سارساق، یالتاق لاری ایله بیر عؤمور موبارزه آپاردیقدان سونرا تاسفله 1990-نجی ایلینده، آنا وطنی ظالیم روس لارین الیندن قورتولا-قورتولدا وفات ائدیر.
اونون 70 اسلسگس نئچه ایل اؤنجه بؤیوك طنطنه ایله یوردونون غیرتلی عالیم لرینین یاردیمی ایله جشن توتولور آمما تاسفله ظالیم شوروی حكومتینین دیزه چؤكمه سینه رغما هله ده اونون ایللر بویو روس لارلا ملی موبارزه سی، یارادیجیلیغی اوستونه كولگه سالیب و یاخشی حالدا تحقیق اولماییب دیر.
بو یازی عاشیقین كامل دیوانینین اؤن سؤزوندن عكس اولونوب.
استاد عاشیق آزافلی میكائیل دن بیر نئچه شعر:
آذربایجادانام آذر اوغلویام
سوروشسالار كیمم، هارالییم من
آذربایجاندانام، آذر اوغلویام
آتام قوجا قافقاز، آنام بو وطن
آذربایجاندانام، آذر اوغلویام
بوردا دده قورقود بویلاری قوردو
سالسالی، بابكب اجنبی ووردو
نظامی، فضولی، نسیمی یوردو
آذربایجاندانام، آذر اوغلویام
((اَوستا))،((خمسه سی)) عصمت چیراغی
زردتشتین وطنی مین جنت باغی
فسونكار، بهره لی هر بیر اویلاغی
آذربایجاندانام، آذر اوغلویام
نئچه اشغالچیلار باج-خراج آلدی
عصیر-عصیر یادلار الینده قالدی
هر دیاری ثروت، جاهی-جلالدی
آذربایجاندانام، آذر اوغلویام
نئچه مین داهی یه آتا-آنا دیر
قارتالی ذیروه لر خانا-خانادیر
دنیا بیر یانادیر او بیر یانادیر
آذربایجاندانام، آذر اوغلویام
هر داشی تورپاغی تختی-تاجیم دیر
هر داغی، آرانی قبله گاهیم دیر
هر اوغلو قارداشیم، قیزی باجیم دیر
آذربایجاندانام، آذر اوغلویام
مدح دیانتلی بؤیوك صنعت لی
اَیلمز وسعتلی، دؤنمز غیرتلی
ایگید-جسارتلی، شاعر-قدرتلی
آذربایجاندانام، آذر اوغلویام
طالعی تاریخی لرزه یه سالان
زال لار قیلینجینی داشلارا چالان
ارضین بهشت باغی، جنتی اولان
آذربایجاندانام، آذر اوغلویام
آزافلی عالیم لر حیراندیر اونا
ائله ائولادی وار جهان دیر اونا
یوز مین جانیم اولسا قورباندیر اونا
آذربایجاندانام، آذر اوغلویام
من سنین عشقینله
سن عزسز آنانین بالاسی یام من
چكمه گل گؤزومدن گؤزونو وطن
گونش ضیاسی لا، باهار الیله
حك ائتدیم سینه مه اؤزونو وطن
دؤشونده سود اَمدیم، قوینوندا یاتدیم
سینه نده بؤیودوم ، كمالا چاتدیم
من سنین عشقینه یازدیم ، یاراتدیم
اؤله رم چئویرسن اوزونو وطن
حیات یول لاریندا آغاردی تئلیم
سوز، صنعت ذیروه نه چاتمادی الیم
یوز مین شاعر گله، یوز مین ده عالیم
یازسالار قوتارماز، سؤزونو وطن
بهشت دیر تورپاغین، سئیرین، چمنین
یوردونا باغلیدیر اوره ییو سنین
نئچه مملكتین، نئچه اؤلكه نین
ایر بیر بارماغینین اوزونو وطن
سنسیز آزافلی نین هئچ اوزو گولمز
یوز دونیا وئرسه لر عینیمه گلمز
دنیزلر قلبیمده گئچیره بیلمز
آلیشان اودونو، كؤزونو وطن
آذربایجان
آذربایجان زمان-زمان
دویان دگیل گؤزوم سندن
قان قانیندان، جان جانیندان
عمروم سندن، اؤزوم سندن
سن آرزومون چیچه یی سن
گؤزه لیم سن، گؤرچه ییم سن
سن الهامین اوره یی سن
مایالانیب سؤزوم سندن
سن ابدی شان- شهرتیم
آدیم سانیم، دیانتیم
كرم عشقیمة محبتیم
جان مندندیر دوزوم سندن
سن عمرومون باهار یازی
ائتمز طالع یازان یازی
آزافلی الینده سازی
دئیر دوزوم-دوزوم سندن